Shkolla e MagjistraturësShkolla e Magjistraturës në bashkëpunim me Këshillin e Evropës, më datë 13 mars 2025, zhvilloi aktivitetin trajnues me temë: “Siguria e gazetarëve me fokus në standardet anti-SLAPPS”, pranë ambienteve të Shkollës së Magjistraturës, në Tiranë.
Ky aktivitet u drejtua nga:
Ekspertë: Alma Kodraliu dhe Albert Kuliçi
Lehtësues: Lutfi Dervishi
Qëllimi i këtij trajnimi është: të rrisë ndërgjegjësimin dhe kuptimin e gjyqtarëve dhe prokurorëve mbi sfidat që hasin gazetarët në ushtrimin e profesionit të tyre, me fokus të veçantë te paditë strategjike kundër pjesëmarrjes publike (SLAPPs), si dhe të ndihmojë gjyqtarët dhe prokurorët të zbatojnë një qasje të drejtë dhe proporcionale ndaj çështjeve që përfshijnë gazetarët, duke balancuar të drejtat e palëve dhe duke parandaluar keqpërdorimin e ligjit për të frikësuar apo heshtur median.
Trajnimi u realizua duke ndërthurur prezantimet (deri në 20-30 min) me diskutimin e çështjeve të shtruara (pyetjeve vetë studimore; pyetje-përgjigje) dhe ushtrimeve me raste praktike & kuize, për të nxitur dhe realizuar ndërveprimin aktiv të pjesëmarrësve.
Gjatë këtij aktiviteti trajnues u trajtuan tema të ndryshme, si:
- E drejta e lirisë së shprehjes dhe informimit dhe detyrimet pozitive të shtetit;
Standardet evropiane që rrjedhin nga kornizat ligjore ndërkombëtare, Rekomandimi CM/Rec(2016)4 duke përfshirë standardet që rrjedhin nga jurisprudenca e GJEDNJ-së. Roli i profesionistëve ligjorë në ruajtjen e këtyre kornizave.
- Situata e sulmeve ndaj gazetarëve në Shqipëri: Forma të ndryshme sulmesh duke përfshirë SLAPP; Diskutim mbi sfidat e mbrojtjes së gazetarëve në Shqipëri;
- Kuadri ligjor shqiptar dhe praktikat e hetimit të sulmeve ndaj gazetarëve në Shqipëri;
- Instrumentet evropiane për të luftuar përdorimin e SLAPP-ve;
- Kriteret përcaktuese dhe treguesit e SLAPPS. Si të identifikohen SLAPPs?
- Shembuj dhe diskutime se si të identifikohen SLAPP-të;
- Masat procedurale mbrojtëse të domosdoshme sipas standardeve evropiane.
Në këtë aktivitet trajnues morën pjesë prokurorë, avokatë, ndihmës ligjorë dhe këshilltarë ligjorë të Republikës së Shqipërisë.
